मुंबईत पावसाचा कहर.. चर्चगेट-पेडर रोडवरही नुकसान..

मुंबईतील मुसळधार पावसामुळे दादरच्या मीनाताई ठाकरे फुलबाजार, चर्चगेट आणि पेडर रोड परिसरात झाडे कोसळली. अनेक स्टॉल आणि वाहनांचे नुकसान झाले असून आयएमडीने मुंबईसह कोकणासाठी रेड अलर्ट जारी केला आहे.

मीनाताई ठाकरे फुलबाजारात झाड कोसळले..

शनिवारी पहाटे दादर येथील मीनाताई ठाकरे फुलबाजारात अचानक मोठे झाड कोसळले. या घटनेत बाजारातील अनेक फुलांचे स्टॉल आणि तेथील साहित्याचे मोठे नुकसान झाले. बाजारात विक्रेते आणि ग्राहकांची गर्दी होण्यापूर्वीच ही घटना घडल्यामुळे मोठी जीवितहानी टळली.

चर्चगेट आणि पेडर रोडवरही झाडे उन्मळून पडली

दरम्यान, दक्षिण मुंबईतील चर्चगेट परिसरातील क्रिकेट क्लब ऑफ इंडिया (सीसीआय) परिसरातही एक मोठे झाड उन्मळून पडले. हे झाड पार्क केलेल्या काळ्या रंगाच्या टाटा नेक्सॉन कारवर कोसळल्याने वाहनाचे मोठे नुकसान झाले. तसेच पेडर रोड परिसरातही आणखी एक झाड उन्मळून पडल्याची घटना घडली. या दोन्ही घटनांमध्येही कोणतीही जीवितहानी झालेली नाही.

दरम्यान, भारतीय हवामान विभागाने (आयएमडी) मुंबई, ठाणे, पालघर, रायगड, रत्नागिरी आणि सिंधुदुर्ग जिल्ह्यांसाठी ४ ते ६ जुलैदरम्यान रेड अलर्ट जारी केला आहे. या काळात अतिमुसळधार पावसाचा इशारा देण्यात आला असून नागरिकांनी अनावश्यक प्रवास टाळावा तसेच जुन्या झाडांपासून, कमकुवत इमारतींपासून आणि धोकादायक ठिकाणांपासून दूर राहावे, असे आवाहन प्रशासनाने केले आहे.