बुधवारी पुन्हा एकदा सत्ताधारी आणि विरोधक यांच्यात जोरदार खडाजंगी होण्याची शक्यता..

NEET परीक्षेची प्रश्नपत्रिका फुटल्याचा आरोप आणि राजधानीत आंदोलकांवरील पोलीस कारवाई या मुद्द्यांवरून संसदेच्या दोन्ही सभागृहांमध्ये सलग दुसऱ्या दिवशी वारंवार कामकाज विस्कळीत झाल्यानंतर, आता संसदेचे पावसाळी अधिवेशन तिसऱ्या दिवसासाठी पुन्हा सुरू होत आहे. बुधवारी पुन्हा एकदा सत्ताधारी आणि विरोधक यांच्यात जोरदार खडाजंगी होण्याची शक्यता आहे.

राहुल गांधी आणि काँग्रेसचे खासदार काळे कपडे परिधान करून संसदेत दाखल; सरकारविरोधात निदर्शने सुरू

सरकारचा निषेध करण्यासाठी विरोधी पक्षनेते राहुल गांधी यांच्यासह काँग्रेसचे खासदार बुधवारी काळे कपडे परिधान करून संसदेत दाखल झाले.

आंदोलकांवरील पोलीस कारवाईविरोधातील जनहित याचिकेवर दिल्ली उच्च न्यायालयात सुनावणी

जंतरमंतर येथे कार्यकर्ते सोनम वांगचुक यांच्या उपोषणादरम्यान विद्यार्थी आणि इतर आंदोलकांवर करण्यात आलेल्या कथित पोलीस कारवाईला आव्हान देणाऱ्या जनहित याचिकेवर दिल्ली उच्च न्यायालय आज सुनावणी करणार आहे. 'एएनआय' या वृत्तसंस्थेने दिलेल्या माहितीनुसार, या याचिकेद्वारे १८ जुलै रोजीच्या कारवाईची स्वतंत्र चौकशी, पुरावे जतन करणे आणि शांततापूर्ण निदर्शने करण्याच्या घटनात्मक अधिकाराचे रक्षण करण्यासाठी मार्गदर्शक तत्त्वे निश्चित करण्याची मागणी करण्यात आली आहे.

आंदोलकांवरील पोलीस कारवाईवरून तृणमूल काँग्रेसची राज्यसभेत नोटीस

दिल्ली पोलिसांनी आंदोलकांवर केलेल्या कथित कारवाईबाबत सभागृहात तातडीने चर्चा व्हावी, यासाठी तृणमूल काँग्रेसने राज्यसभेत नियम २६७ अन्वये नोटीस दिली आहे.

NEET प्रश्नपत्रिका फुटीच्या मुद्द्यावर चर्चेची 'आप'चे खासदार संजय सिंह यांची मागणी

आम आदमी पक्षाचे राज्यसभेतील खासदार संजय सिंह यांनी नियम २६७ अन्वये 'कामकाज स्थगितीची नोटीस' (Suspension of Business Notice) दिली आहे. याद्वारे त्यांनी NEET-UG प्रश्नपत्रिका फुटल्याचा आरोप, सार्वजनिक परीक्षा प्रणालीतील अपयश, आंदोलकांवरील पोलीस कारवाई आणि कार्यकर्ते सोनम वांगचुक यांची खालावलेली प्रकृती या मुद्द्यांवर चर्चेची मागणी केली आहे.