‘नीट’ परीक्षा वाद आणि नुकत्याच झालेल्या कॉकरोच जनता पार्टीच्या जंतरमंतर आंदोलनादरम्यान घडलेल्या घडामोडींच्या पार्श्वभूमीवर विद्यार्थ्यांनी हा आक्षेप घेतला आहे..

सविस्तर वृत्त असे की, हैदराबाद येथील नॅशनल अकॅडमी ऑफ लीगल स्टडीज अँड रिसर्च विद्यापीठातील सुमारे ४५० विद्यार्थ्यांनी २०२६ च्या पदवीदान समारंभात भारताचे सरन्यायाधीश सूर्य कांत यांना प्रमुख पाहुणे म्हणून आमंत्रित करण्यास विरोध दर्शवला आहे. ‘नीट’ परीक्षा वाद आणि नुकत्याच झालेल्या कॉकरोच जनता पार्टीच्या जंतरमंतर आंदोलनादरम्यान घडलेल्या घडामोडींच्या पार्श्वभूमीवर विद्यार्थ्यांनी हा आक्षेप घेतला आहे. 

२०२६ च्या तुकडीतील विद्यार्थ्यांच्या एका गटाने विद्यापीठाचे कुलगुरू, कुलसचिव, प्राध्यापक वर्ग आणि प्रशासनाच्या इतर सदस्यांना पत्र लिहिले आहे. यात त्यांनी सरन्यायाधीशांना प्रमुख पाहुणे म्हणून आमंत्रित करण्याच्या निर्णयावर पुनर्विचार करण्याची विनंती केली आहे.

विद्यार्थ्यांनी दिला घटनात्मक उत्तरदायित्वाचा हवाला

विद्यार्थ्यांनी लिहिलेल्या पत्रानुसार, सर्वोच्च न्यायालयात आंदोलनाविरोधात दाखल याचिकांच्या सुनावणीदरम्यान घडलेल्या घडामोडींबद्दल वाटणाऱ्या चिंतेमुळे हा विरोध केला जात आहे. आंदोलनकर्त्या विद्यार्थ्यांनी घटनात्मक उत्तरदायित्व आणि शैक्षणिक स्वातंत्र्याचे महत्त्वही अधोरेखित केले आहे. सध्याच्या परिस्थितीत सरन्यायाधीश सूर्य कांत यांना या समारंभासाठी आमंत्रित करणे या मूल्यांशी सुसंगत ठरणार नाही, असे विद्यार्थ्यांनी म्हटले आहे. याच मुद्द्यांना आधार बनवत विद्यार्थ्यांनी त्यांना प्रमुख पाहुणे म्हणून बोलावण्याच्या निर्णयावर पुनर्विचार करण्यास सांगितले आहे.

पदवीदान समारंभाची तारीख आजपर्यंत कळवा

पदवीदान समारंभाची तारीख आणि मुख्य अतिथी अद्याप अधिकृतपणे ठरलेले नाहीत, त्यामुळे कोणत्याही निर्णयापूर्वी विद्यार्थ्यांना आपल्या चिंता प्रशासनासमोर मांडायच्या आहेत, असे पत्रात म्हटले आहे. विद्यार्थ्यांनी विद्यापीठाकडून लवकरात लवकर उत्तराची मागणी केली असून, सोमवारपर्यंत उत्तर दिल्यास अधिक चांगले होईल, असे नमूद केले आहे.