भूकंपानंतर जपानच्या पंतप्रधान कार्यालयाने संबंधित यंत्रणांना नुकसानाचा तातडीने आढावा घेण्याचे आदेश दिले आहेत..

टोकियो : जपानच्या दक्षिणेकडील क्युशू बेटावरील क्युमामोटो प्रांतात मंगळवारी (दि. २८) ७.१ रिश्टर तीव्रतेचा शक्तिशाली भूकंप झाला. भूकंपानंतर जपान हवामान विभागाने त्सुनामीचा इशारा जारी केला असून, किनारी भागातील नागरिकांना सुरक्षित आणि उंच ठिकाणी स्थलांतर करण्याचे आवाहन केले. दरम्यान, भूकंपामुळे इमारती हादरत असल्याचे आणि नागरिकांमध्ये घबराट उडाल्याचे अनेक व्हिडिओ सोशल मीडियावर व्हायरल होत आहेत.

१० किलोमीटर खोलीवर होता केंद्रबिंदू

जपान हवामान विभागाच्या माहितीनुसार, भूकंपाचा केंद्रबिंदू समुद्रसपाटीखाली सुमारे १० किलोमीटर खोलीवर होता. भूकंपानंतर सुमारे १ मीटर उंचीच्या त्सुनामी लाटा येण्याची शक्यता वर्तवण्यात आली आहे.

NHK च्या वृत्तानुसार, काही किनारी भागात अशा उंचीच्या लाटा पोहोचल्याची शक्यता व्यक्त करण्यात आली आहे.

पंतप्रधान कार्यालयाचे तातडीचे निर्देश

भूकंपानंतर जपानच्या पंतप्रधान कार्यालयाने संबंधित यंत्रणांना नुकसानाचा तातडीने आढावा घेण्याचे आदेश दिले आहेत. तसेच नागरिकांच्या सुरक्षेला सर्वोच्च प्राधान्य देत बचाव आणि मदतकार्य तत्काळ सुरू ठेवण्याच्या सूचना देण्यात आल्या आहेत.

सात प्रांतांसाठी आपत्कालीन इशारा

भूकंपानंतर क्युमामोटो, नागासाकी, कागोशिमा, फुकुओका, सागा, ओइता आणि मियाझाकी या क्युशू बेटावरील सातही प्रांतांसाठी आपत्कालीन इशारे जारी करण्यात आले आहेत.

आठवडाभरात दुसरा मोठा भूकंप

याआधी २५ जून रोजी उत्तर जपानमध्ये ७.२ रिश्टर तीव्रतेचा भूकंप झाला होता. त्या भूकंपात मोठ्या प्रमाणातील जीवितहानी झाली नव्हती.

भूकंपप्रवण देश म्हणून जपान

जपान हा जगातील सर्वाधिक भूकंपप्रवण देशांपैकी एक आहे. पॅसिफिक महासागरातील 'रिंग ऑफ फायर' या भागात चार प्रमुख टेक्टॉनिक प्लेट्सच्या संगमावर हा देश असल्यामुळे येथे दरवर्षी शेकडो भूकंप होतात. जगभरातील एकूण भूकंपांपैकी सुमारे १८ टक्के भूकंप जपानमध्ये होतात.

बहुतांश भूकंप सौम्य असले तरी त्यांची तीव्रता, केंद्रबिंदूची खोली आणि स्थान यावर नुकसानाचे प्रमाण अवलंबून असते.

२०११ च्या भीषण त्सुनामीची आठवण कायम

२०११ मध्ये ९.० रिश्टर तीव्रतेच्या महाभूकंपानंतर आलेल्या त्सुनामीत सुमारे १८,५०० जणांचा मृत्यू किंवा बेपत्ता झाल्याची नोंद आहे. या आपत्तीत फुकुशिमा अणुऊर्जा प्रकल्पालाही मोठे नुकसान झाले होते.

तसेच यावर्षी २० एप्रिल रोजी ७.७ रिश्टर तीव्रतेच्या भूकंपामुळे देशाच्या उत्तरेकडील भागात अनेक इमारती हादरल्या होत्या आणि किमान १० जण जखमी झाले होते. त्या घटनेनंतर प्रशासनाने मोठ्या भूकंपाचा विशेष इशारा दिला होता, जो आठवडाभरानंतर मागे घेण्यात आला.