भारतीय नौदलातील एका खलाशाच्या (sailor) पत्नीने मृत्यूपूर्वी आठवडाभर आधी आपल्या वडिलांना सांगितले होते की, पती आपल्याला आणि मुलांना जीवे मारेल अशी तिला भीती वाटत आहे. तिचे वडील त्यांना सोबत घेऊन जाण्यासाठी मुंबईला आले होते, परंतु त्या खलाशाने त्यांना रोखल्याचे समजते. पोलिसांचा संशय आहे की, त्यानंतर त्या खलाशाने पत्नी आणि दोन मुलांची हत्या केली आणि नंतर आत्महत्या केली..

मुंबई: नेव्ही नगर येथील निवासस्थानी पती आणि दोन लहान मुलांसह मृत अवस्थेत आढळण्यापूर्वी, एका नौदल खलाशाच्या पत्नीने आपल्या वडिलांना सांगितले होते की, पती आपल्याला आणि मुलांना जीवे मारेल अशी तिला भीती वाटते. या संशयास्पद हत्या आणि आत्महत्या प्रकरणाचा तपास करणाऱ्या पोलिसांना आता समजले आहे की, तिचे वडील त्यांना घेऊन जाण्यासाठी मुंबईला आले होते आणि त्यांनी तसा प्रयत्नही केला होता, परंतु एका वादामुळे त्या खलाशाने त्यांना रोखले.

रविवारी नेव्ही नगरमधील अधिकृत निवासस्थानी ३० वर्षीय खलाशी, त्याची पत्नी आणि त्यांची तीन वर्षांची व दोन महिन्यांची मुले मृत अवस्थेत आढळली. पोलिसांचा असा संशय आहे की, खलाशाने पत्नी आणि मुलांची हत्या केल्यानंतर आत्महत्या केली.

*पत्नीने वडिलांना केला होता फोन*

'हिंदुस्तान टाइम्स'च्या वृत्तानुसार, पोलीस उपायुक्त (झोन १) मनीष कलवानिया यांनी सांगितले की, घटनेच्या सुमारे आठवडाभर आधी त्या महिलेने आपल्या वडिलांना फोन केला होता. तिने त्यांना सांगितले होते की तिला भीती वाटत आहे, कारण नैराश्यामुळे (depression) अनेक महिन्यांपासून उपचार घेत असलेला तिचा पती कुटुंबाला इजा पोहोचवू शकतो.

त्यानंतर तिचे वडील मुंबईला आले आणि मुलगी व नातवंडांना आपल्यासोबत घेऊन जाण्याचा प्रयत्न केला. मात्र, त्या खलाशाने त्यांच्याशी वाद घातला आणि त्यांना जाण्यापासून रोखले.

*पोलिसांकडून कौटुंबिक परिस्थितीचा तपास*

पोलिसांनी सांगितले की, राजस्थानमधील असलेल्या या जोडप्याचे लग्न होऊन जवळपास चार वर्षे झाली होती आणि त्यांच्यात वारंवार भांडणे होत असत. तसेच, त्यांच्या दोन्ही कुटुंबांमधील संबंधही तणावपूर्ण असल्याचे पोलिसांना समजले आहे. एका अधिकाऱ्याने दिलेल्या माहितीनुसार, ती महिला आर्थिकदृष्ट्या कमकुवत पार्श्वभूमीतून आली होती आणि खलाशाच्या आईव्यतिरिक्त, दोन्हीपैकी कोणत्याही कुटुंबातील सदस्यांनी या जोडप्याच्या दोन महिन्यांच्या मुलीला भेटण्यासाठी मुंबईला भेट दिली नव्हती.

मिळालेल्या माहितीनुसार, संबंधित खलाशी नैराश्यावर (डिप्रेशन) उपचार घेत होता आणि वारंवार मृत्यूविषयी बोलत असे, अशी पुष्टी पोलिसांनी केली आहे. त्याच्या वागणुकीमुळे, तो स्वतःला आणि आपल्या मुलांना इजा पोहोचवू शकतो, अशी भीती त्याच्या पत्नीला वाटू लागली होती.

हत्येनंतर आत्महत्येचा पोलिसांना संशय

पोलिसांचा असा संशय आहे की, त्या खलाशाने आधी आपली पत्नी आणि मुलांची हत्या केली असावी आणि त्यानंतरच्या दिवशी शेजारच्या खोलीत आत्महत्या केली असावी. पोलिसांनी सांगितले की, त्याने दुसरी खोली स्वच्छ केल्याचे आणि आपल्या मोबाईल फोनमधील डेटा डिलीट केल्याचे दिसून आले आहे. ज्या खोलीत त्याचा मृतदेह आढळला, त्या खोलीच्या दरवाजाला त्याने आतून अडथळा म्हणून पलंग लावून घेतला होता, जेणेकरून कोणीही आत येऊ नये.

तिघांची हत्या नेमकी कशा प्रकारे करण्यात आली, हे अद्याप स्पष्ट झालेले नाही. मृतांच्या तोंडावाटे फेस येत असल्याचे आढळल्याने, पोलिसांनी विषप्रयोग किंवा इंजेक्शनद्वारे एखादे द्रव्य देऊन हत्या केली असण्याची शक्यता वर्तवली आहे.

फॉरेन्सिक अहवालांची प्रतीक्षा

शवविच्छेदनातून मृत्यूचे नेमके कारण अद्याप स्पष्ट झालेले नाही. कफ परेड पोलीस आता 'व्हिसेरा' (viscera) नमुन्यांच्या फॉरेन्सिक प्रयोगशाळेतील अहवालाची वाट पाहत आहेत. अन्न किंवा पाण्याद्वारे विषबाधा झाली आहे का, हे तपासण्यासाठी घरातून गोळा केलेले अन्न आणि पाण्याचे नमुनेही कलिना येथील फॉरेन्सिक प्रयोगशाळेत पाठवण्यात आले आहेत. फॉरेन्सिक अहवाल आणि घर तसेच खलाशाच्या इलेक्ट्रॉनिक उपकरणांतून मिळालेल्या इतर पुराव्यांच्या आधारे पुढील तपास केला जाईल, असे पोलिसांनी सांगितले.