मुंबईत दहीहंडी उत्सवादरम्यान २२ गोविंदा जखमी झाले असल्याची माहिती समोर येत आहे..

कृष्ण जन्माष्टमीनिमित्त मुंबईसह राज्यभर दहीहंडी मोठ्या उत्साहात साजरी केली जात आहे. उंचावर बांधलेली हंडी फोडण्यासाठी गोविंदा पथकांकडून मानवी मनोरे रचले जात आहेत. मात्र, काही ठिकाणी थर कोसळणे किंवा तोल जाण्याच्या घटनांमुळे गोविंदांना दुखापत झाल्याचं समोर आलं आहे.

मुंबईत २२ गोविंदा जखमी

मुंबई महापालिकेच्या माहितीनुसार, शनिवारी (दि.०५) दुपारपर्यंत मुंबई आणि उपनगरांत दहीहंडी उत्सवादरम्यान २२ गोविंदा जखमी झाले. शहरातील रुग्णालयांमध्ये दाखल करण्यात आलेल्या २० जखमींना उपचारानंतर डिस्चार्ज देण्यात आला.

पूर्व उपनगरातील एका जखमी गोविंदालाही उपचारानंतर घरी सोडण्यात आलं आहे. पश्चिम उपनगरातील एक गोविंदा मात्र सध्या उपचाराधीन आहे.

जखमी गोविंदांसाठी १०० हून अधिक बेड सज्ज

दहीहंडीच्या पार्श्वभूमीवर मुंबई महापालिकेने जखमी गोविंदांच्या उपचारासाठी विशेष व्यवस्था केली आहे. पालिकेची १६ उपनगरीय रुग्णालयं तसेच सायनमधील लोकमान्य टिळक महापालिका रुग्णालय, परळमधील केईएम आणि मुंबई सेंट्रलमधील नायर रुग्णालयात मिळून १०० हून अधिक बेड राखीव ठेवण्यात आले आहेत.

शहरातील संवेदनशील भागांत पोलिसांनीही बंदोबस्त वाढवला असून, गर्दीच्या ठिकाणी अतिरिक्त पोलीस कर्मचारी तैनात करण्यात आले आहेत.