ठाणे शहरातील भाजपचे ज्येष्ठ नगरसेवक मनोहर डुंबरे यांच्या कन्या तथा उद्योजिका तन्वी डुंबरे यांची सेलिब्रिटींकडून ब्रँड प्रमोशन करून देण्याचे आमिष दाखवून २५ लाख ८६ हजार रुपयांहून अधिक रकमेची फसवणूक झाल्याचा प्रकार समोर आला आहे..

ठाणे : ठाणे शहरातील भाजपचे ज्येष्ठ नगरसेवक मनोहर डुंबरे यांच्या कन्या तथा उद्योजिका तन्वी डुंबरे यांची सेलिब्रिटींकडून ब्रँड प्रमोशन करून देण्याचे आमिष दाखवून २५ लाख ८६ हजार रुपयांहून अधिक रकमेची फसवणूक झाल्याचा प्रकार समोर आला आहे. याप्रकरणी हरियाणास्थित पीआर कंपनीच्या संचालिकेविरुद्ध कासारवडवली पोलीस ठाण्यात गुन्हा दाखल करण्यात आला आहे.

तन्वी डुंबरे यांचा महिलांच्या कपड्यांचा ऑनलाइन ब्रँड आहे. जुलै २०२५ मध्ये संबंधित पीआर कंपनीच्या संचालिकेने नामांकित बॉलिवूड कलाकार, इन्फ्लुएन्सर्स आणि मॉडल्समार्फत ब्रँडचे प्रमोशन करून देण्याचे आश्वासन दिले. त्यासाठी १२ महिन्यांचा रिटेनर करार करण्यात आला. त्यानुसार तन्वी यांनी ५ लाख २६ हजार ५०० रुपये आरटीजीएसद्वारे दिले, तसेच प्रत्येकी ५ लाख २६ हजार ५०० रुपयांचे तीन धनादेश दिले. कंपनीच्या सांगण्यानुसार विविध सेलिब्रिटी आणि त्यांच्या स्टायलिस्टकडे ब्रँडचे कपडे पाठविण्यात आले. मात्र, प्रमोशनचे कोणतेही काम झाले नाही. उलट सुमारे २० लाख ६० हजार रुपये किमतीचे कपडे परत न करता त्यांचा अपहार केल्याचा आरोप तक्रारीत करण्यात आला आहे. याप्रकरणी पोलिसांनी गुन्हा दाखल केला असून पुढील तपास सुरू आहे.